мај
а:арбреров а.

 

с:спирализирање

Тој ден, додека паразитирав на креветот, јас се замислив себеси како полжав. И одеднаш, нешто ме преврти, соборувајќи ме на земја. Што се случува, вриснав и се обидов да се подигнам. Но, не можев никако, по ѓаволите, колку и да се обидував, јас не можев да придвижам ниту еден дел од моето тело, ниту еден единствен прст. Единствено-очите. Погледнав наоколу. Околу мене немаше ништо, освен сино платно со облаци за кое не знаев дека воопшто го има во мојата соба. По извесно време јас сфатив дека сум полжав, но дека сум заборавил при замислувањето да ја намалам тежината на мојата двокатна куќа.


 

н:ноќ на полна месечина

Цигарата е испушена. Автоматизираните инсекти иритирачки кружат околу испушокот на денот, се додека конечно не ги смири смртоносниот бакнеж на уличните метални дами за кои се лепат привлечени од нивната радиоактивно жолта аура. Се е црвено од љубов и подготвено за испорака во локалната месарница. Месарот ги остри своите мисли со нож, притоа отсекувајќи си ја главата. Топката се стркалува низ лепливата крв оставајќи прекрасен црвен отисок на скалите. Ми почнал циклусот, помислува една девојка. Зарем не е малку рано?! Сигурно дека е. Месечината сеуште не излегла од канализацискиот отвор. Исто и месечарите.
Оваа ноќ кукларот спие. Сенките ќе останат залепени за ѕидот. Проклето статични и неподвижни. Но, полната месечина се појавува во последен момент и ги оживува и нив, и тие ги протриваат очите и излегуваат од ѕидот подготвени за блуд. Изопачено. Изопачено. Ангелите ги соблекуваат крилјата и почнуваат да водат љубов, да разменуваат течности и останати материи.
Оваа ноќ е, исто така, доста инспиративна и за лебарките. Тие излегуваат од својот интимен микрокосмос сместен во отворот на левиот агол и го започнуваат својот полноќен хедонистички танц, удирајќи со своите преакустични нозе врз затегнатиот стомак на подот. Ѕидовите оваа ноќ, за жал, имаат уши и мораат да го слушаат тој инспиративно конспиративен акустичен танц.
Девојките, обземени од појавата на полна месечина, нетрпеливо ги извлекуваат прстените од своите прсти и вселувајќи ја месечината во истите, почнуваат да замислуваат желби... но, што се случува??! Нивните раце, придвижени од непознат каприц, почнуваат да се лизгаат надолу, кон нивните полови органи и тие се претвораат во изопачени воајери кои, користејќи ги своите прстени како клучалки, почнуваат да мастурбираат на мозокот на месечината. Крајот е фатален: Месечината останува заглавена во еден од прстените.
На ноќ на полна месечина...
,,Оваа ноќ ќе се случат уште многу други работи, но јас морам да спијам”, рече ноќта, крајно исфрустрирана и ги затвори капаците, оставајќи ме да зјапам во празнината која ја отвори устата и ме проголта и мене.