август/септември
а:арбреров а.

 

в:во деновите помеѓу

Последни денови од сезоната се деновите помеѓу. Во тие денови ти мораш да бидеш исклучително внимателен, и пред да го поминеш мостот да се обѕрнеш од двете страни. Со себе задолжително треба да се понесе водичот за распознавање на мртвите удавени под мостот; во тие сијамски рефлексии во горчливо зеленикавата вода секогаш се наоѓа некој кој некогаш си го познавал, некој за кој мислиш дека сеуште го познаваш. Во тие денови треба да се биде навистина внимателен. Од која страна дува ветрот, колку изнесува температурата и влажноста на воздухот и уште некои други мошне битни параметри. Строго треба да се одбегнува перцепцијата на одредена група растенија, дрвја, извесен тип на облаци, извесен профил на животни.... Избегнувањето на таа група на растенија, животни, па и луѓе, е еден вид на одбрамбен механизам против силите на смртта кои се активни за време на деновите помеѓу. Извесен поглед, на пример, на прегазена мачка, може да доведе до дестабилизација на крвниот притисок, и да доведе до самоубиство во истиот момент. Во оваа група на забранети животни се наоѓаат и раковите. Раковите се опасни дури и кога не одат наназад. Ако видете рак кој оди два пати наназад и три пати нанапред тоа значи дека вие сте потенцијален мртовец. Смртта настапува непосредно по визуелниот контакт.
Исто, извесни облаци, кумулонимбуси, можат да доведат до самоубиство со давење. Затоа, перцепцијата на ваквите облаци е строго забранета во ваквите денови.
Ти го забрзуваш чекорот, обидувајќи се да не мислиш на ништо во овој момент, а најмалку да перцепираш облаци. Твојата нога несмасно преминува преку труп на прегазена мачка. Почнуваш да го чувствуваш одбројувањето на твојот (не)водоотпорен мускулен часовник. Сеедно ти е. Знаеш дека сончогледот кој ја свртува главата кон тебе го упатува својот заканувачки поглед на некој друг, некој кој не си ти. Почнуваш да трчаш, иако ти е навистина сеедно. Застануваш и внимателно ги затвораш очите за да избегнеш било каква перцепција.
...
Според свежиот воздух, ти заклучуваш дека веќе си во опасност.