к:крстевски ѓорѓи

т:турист

Турист
во сопствениот град

шетам
и разгледувам

по илјадити пат
ù се восхитувам
на грдотијата




љ:љубовни баналности

Јас те бла бла бла
а ти не ме бла бла бла
зошто бла бла бла
зошто бла бла бла




с:сеќавања

Налети на студен ветар
сеќавања
од кои ни се ежи кожата
 

н:над мојата глава лебди облак што постојано ми создава неволји

Чекорам меѓу илјадници изгубени луѓе
само мене ме врне дожд
 

п:последниве неколку години

На Маргарита В.

Трчањето по возот
што веќе заминуваше
од железничката станица
беше највозбудливото нешто
што ми се случило
последниве неколку години
последниве неколку здодевни години
 

н:никогаш

Секогаш
вистинските нешта
во погрешно време
погрешните нешта
во вистинско време
потоа
погрешните нешта
во погрешно време
никогаш
вистинските нешта
во вистинско време
никогаш
 

м:молк

Ставам прст на усните
Сè се стишува
Молк
Само штурците од мојата глава
се слушаат
 

е:ехо

Трчам гол во ноќта
и викам
гласно викам
моето ехо одекнува
во празнината
тешко е да си сам
тешко е да си сам
 

г:господ

Илјада лаги
една вистина
Илјада вистини
една лага
 

в:вљубеност

Така почнува тоа:
прво ја губиш едната рака
потоа ја губиш и другата
после ја губиш едната нога
а по неа и втората
потоа го губиш трупот
а на крајот
и главата