в:велковска билјана

а:агли

    Меланхоличните луѓе живеат во агли. Сите што сакаат да читаат живеат во агли. Вљубените живеат во агли. Оние кои имаат несоница живеат во агли. Во средината останува бучна, шарена, циркуска толпа. Сите рецитираат, сите голтаат пламен, сите се кротители, сите се кротени, сите изведуваат акробации. Во исто време. Вистински тажно е што во циркуските кругови нема агли.

 

м:моментот

    Моментот што ти се виде погоден да ме импресионираш со зборови како одговорност и должност беше моментот кога премолчев дека не те сакам поради нив, туку и покрај нив.

 

п:портрет

    Запознавањето некого наликува на бришење на неговиот портрет. Прво се замаглуваат формите, па контурите избледуваат и боите испаруваат. На крајот останува само бело платно за проекции.

 

т:таа

    Кога си замина таа, ја снема и радоста. Никогаш не најдов таква радост во ниедна друга жена. Всушност, не е радоста она што ми недостасува. Ми недостасува таа.

а:автори